‘Newsletter’ di Luna

LWI Newsletter 80 – Un Dimenshon Diferente di Dunamentu

“Pasku no ta djis un tempu pa festehá i gosa……….. Ta un tempu pa kontemplá kosnan eterno. Spiritu di Pasku ta un spiritu di duna i pordoná.” —J. C. Penney

Fin di aña ta trese e dianan di mas bunita i pasífiko di aña kuné. Unda ku bo bai tin manera un sentido di transformashon, ku hendenan radiando pas i goso. Kantikanan di Pasku manera “Joy to the World”, hasimentu di kompra i interkambio di regalo ku bo sernan stimá, ta forma parti di e spiritu dje tempu aki.

Nos di LWI ta kere ku e goso i pas ku nos ta kompartí aki ta reflehá nos propósito real. Meskos ku un outo eléktriko ta kore bon-bon ora bo karg'é - pero lo keda sin kore si bo yen'é ku gasoline - asina nos tambe lo progresá ora nos ta riba mésun liña ku nos propósito real. Esaki ta esensia di e goso ku nos ta eksperensiá ku Pasku.

E dianan aki di goso i pas ta drai rònt di nasementu di un hòmber ku yama HesuKristu kende Su impakto a kambia mundu na un manera sin presedente. Asta e manera ku nos ta midi tempu - tantu aña promé ku Kristu òf despues di Kristu - ta testigu di su influensia permanente. Su siñansa tokante stimashon i sakrifisio ta resoná ketu bai den nos sosiedatnan asta despues di 2000 aña di su nasementu, irespekto e diferente puntonan di bista religioso ku tin den mundu.

Sinemargo tin un detaye chikí den e storia aki ku mayoria hende no ta konsiente di dje. Promé ku Hesus a nase, su mama Maria tabata komprometí ku Hose i prepará pa kasa. Den tradishon Hudiu, un kompromiso pa kasa tabata un kompromiso obligatorio ku ta karga mésun peso ku matrimonio. Pero sorpresivamente Maria a sali na estado di Hesus promé ku el a tene relashon seksual ku Hose. Den kultura Hudiu, relashon seksual tabata wòrdu aprobá solamente den matrimonio. Pues, sabiendo ku e no a tene relashon seksual ku Maria, Hose a premirá ku Maria ta bai hañ’é den masha problema. Lo e wòrdu akusá di a kòrta Hose su orea i lo wòrdu poné na bèrgwensa públikamente. Pero e storia ta bisa ku Hose no kier a pon’é na bèrgwensa i a plania pa divorsiá di dje den sekreto.

Ku esaki, Hose a mustra ku e ta un hende íntegro, no pasobra el a wak su interes ma pasobra el a skohe pa no pone un otro hende na bèrgwensa. Su meta tabata pa minimalisá bèrgwensa di Maria aunke e mes tabata bou’i karga di un desapunto pisá.

Bo n’ ta kere ku e integridat aki ta pas perfektamente den e spiritu di Pasku? Dunamentu di regalonan físiko ta ekselente pero imaginá bo si den bida diario, nos empeñá pa spar nos kasá, yunan, bisiña òf kolega kualke bèrgwensa sin ferwagt nada a kambio. Esei lo agregá un dimenshon mas profundo na nos aktonan di kariño i kompartí.

Finalmente, ta esaki ta loke Hesus a hasi riba un eskala mas grandi. Dor di Su nasementu i finalmente Su morto na e krus (loke nos ta selebrá na Pasku di resurekshon), El a sakrifiká su honor, reputashon i finalmente su bida pa optené pa nos esun regalo ku nos tur ta deseá pero no por haña irespekto tur nos esfuersonan.

Nos ta enkurashá bo pa agregá e dimenshon nobo aki na bo dunamentu den e dianan di fiesta aki. Leading With Integrity ta deseá abo i bo sernan kerí un Pasku fruktífero i un felis aña nobo 2025.